Шир барои корхонаҳои шароити меҳнаташон зарарнок

Душанбе, 17.09.2014. (АМИТ «Ховар», Лайло Тоирӣ).- Ҳукумати Ҷумҳурии Тоҷикистон дар бораи тасдиқ намудани қоидаҳо ва меъёрҳои ба кормандон додани шир, хӯроки табобатию профилактикӣ, либоси махсус, пойафзоли махсус ва дигар воситаҳои ҳифозати фардӣ, таъмин намудани кормандон бо воситаҳои ҳифозати коллективӣ, биноҳои санитарию маишӣ ва дастгоҳу таҷҳизот аз ҳисоби маблағҳои корфармо қарор қабул намуд. 
Дар робита ба қарори мазкур Вазорати меҳнат, муҳоҷират ва шуғли аҳолии Ҷумҳурии Тоҷикистон вазифадор гаштааст, ки корҳои фаҳмондадиҳиро оид ба тадбиқи қоидаҳои мазкур ва назорати ҷараёни  иҷрои он таъмин намояд. 
Амали қоидаҳои мазкур корхонаҳоеро фаро мегирад, ки шароити меҳнаташон зарарнок (махсусан зарарнок) ва хатарнок мебошад. 
Шир ва хӯроки табобатию профилактикӣ ба кормандон аз рӯи натиҷаҳои аттестатсияи шароити меҳнати объектҳои истеҳсолӣ, бо мақсади пешгирӣ намудани бемориҳои касбӣ ва заҳролудшавӣ, таҳкими саломатии коргарон дода мешавад. 
Хӯроки табобатию профилактикӣ ва шир дар рӯзҳои ғайрикорӣ, рухсатӣ, сафарҳои хизматӣ, рӯзҳои таҳсили ҷудо аз истеҳсолот, рӯзҳои иҷрои кор дар дигар қитъаҳое, ки додани хӯроки табобатию профилактикӣ пешбинӣ нашудааст ва дар давраи корношоямии муваққатӣ дода намешавад.   
Додани хӯроки табобатию профилактикӣ барои рӯзҳои гузашта ё худ пешакӣ додан барои якчанд баст, инчунин пардохти ҷубронпулии хӯроки табобатию профилактикии дар вақташ нагирифта мутобиқи ин қарор манъ аст. 
Хӯроки табобатию профилактикӣ ба коргарон ва устоҳое, ки рӯзи пурраи корӣ дар раванди асосии технологӣ ба таъмир ва хизматрасонии таҷҳизоти истеҳсоли кислотаи сулфат, хлори моеъ, оҳаки хлордор, хлориди оҳан, фосген, фториди натрий, хлорпикрин ва амсоли инҳо машғуланд, дода мешавад.
Воситаҳои ҳифозати фардӣ дар вақти ба кор қабул кардан, ба кори дигар гузаронидани корманд ё худ гузаштани муҳлати истифодаи ин воситаҳо дода мешаванд. 
Тартиб ва меъёрҳои намунавии ройгон додани либоси махсус, пойафзоли махсус ва дигар воситаҳои ҳифозати фардӣ ба кормандон ва хизматчиён аз ҷониби Вазорати меҳнат, муҳоҷират ва шуғли аҳолии ҶТ, Вазорати молияи ҶТ, Вазорати тандурустӣ ва ҳифзи иҷтимоии аҳолии ҶТ дар мувофиқа бо Федератсияи иттифоқҳои касабаи мустақили Тоҷикистон ва Иттиҳодияи корфармоёни Ҷумҳурии Тоҷикистон таҳия ва тасдиқ мешавад.