Суғд: Бузургдошти Мавлоно Ҷомӣ дар қисми низомӣ

Душанбе, 18.09.2014. (АМИТ “Ховар”, Ситораи Боймурод).- Соли равон бо ибтикори Ҳукумати Ҷумҳурии Тоҷикистон дар кишвар 600-солагии мутафаккири беназир Мавлоно Абдураҳмони Ҷомӣ ҷашн гирифта мешавад.  Тавре ки дар ин бора хадамоти матбуоти раиси вилояти Суғд хабар додааст, бо ин мақсад имрӯз, дар госпитали ҳарбии гарнизони Суғд ва қисми низомии 08362, воқеъ  дар шаҳри Чкалов ба хотири гиромидошти 600-солагии Мавлоно Абдураҳмони Ҷомӣ маҳфилӣ илмӣ-адабӣ доир гардид.
Нуралӣ Нурзод, донишманди тоҷик, устоди Донишгоҳи давлатии Хуҷанд  ба номи академик Бобоҷон  Ғафуров  иброз дошт, ки дар меҳвари сиёсат қарор гирифтани бузургдошти Абдураҳмони Ҷомӣ ва дигар фарзандони фарзонаи миллат ибтикороти хеле бузург аст. Мавлоно Ҷомӣ бо ифтихор дар осораш аз тоҷик буданаш ёд карда аст.
Ба таъкиди Н. Нурзод  Абдураҳмони Ҷомӣ дар адабиёти классикӣ шахсияти беназир аст. Бо таҷлили 600-солагии бузургдошти Мавлоно Ҷомӣ мо боз ҳам жарфтар ба эҷодиёт ва мероси пурғановати Ҷомӣ руҷӯъ намуда, барои худ як маҷрои нави зиндагиро кашф хоҳем кард, -иброз дошт Н. Нурзод.
Ҳамзамон гуфта шуд, ки аз Ҷомӣ осори гаронбаҳое ба мо мерос мондааст ва дар он асарҳо тамоми масъалаҳо, аз ҷумла андешаҳои иҷтимоӣ, ахлоқӣ, фалсафӣ ва ғайра ҷой дода шудааст.