Таҷлили Рӯзи дониш дар ДАТ

Душанбе, 2.09.2014. (АМИТ «Ховар», Зарангези Латиф).- Дирӯз дар Донишгоҳи аграрии Тоҷикистон ба номи Шириншоҳ Шоҳтемур бо иштироки вазири кишоварзӣ Қосим Роҳбар Рӯзи дониш таҷлил шуд. 
Дар дохили бинои асосии донишгоҳ намоиши китоб, маҷаллаву рӯзномаҳои ин боргоҳ, ки аз тарафи олимону донишҷӯён таълиф ёфтаанд, ташкил шуда, вазир ба фаъолияти илмиву методии олимон ва донишҷӯён баҳои хуб дода,  ҳамкориҳои зичтари онҳоро бо мутахассисони вазорат тақозо намуд. 
Вазири кишоварзӣ Қ. Роҳбар оид ба моҳияти сиёсати маорифпарваронаи Сарвари мамлакат, дастгириҳои ҳамешагии давлату ҳукумат аз донишгоҳ, зарурати мутахассисони баландихтисос барои рушди минбаъдаи соҳаи кишоварзӣ ва талаботи замон ба навовариву ташаббускориҳои ҷавонон сухан ронда, мавқеи донишгоҳи мазкурро дар иқтисодиёти кишвар ва хусусан пешрафту татбиқи ислоҳоти соҳаи аграрӣ хеле баланд арзёбӣ намуд.