Таҷлили Рӯзи Фалак дар Душанбе

Душанбе, 23.09.2014. (АМИТ «Ховар», Зарангези Латиф).-10-уми октябри соли равон дар толори Муассисаи давлатии Филармонияи давлатии Тоҷикистон ба номи А.Ҷӯраев бахшида ба Рӯзи Фалак барномаи консертӣ доир мегардад.
Тавре ки аз дафтари матбуоти Вазорати фарҳанги ҷумҳурӣ хабар доданд, барномаи консертӣ бо иштироки фалаксароёни ҷавон ва устодони фалаксаро аз тамоми шаҳру навоҳии кишвар баргузор хоҳад шуд.
Гуфта мешавад, ки мусиқӣ дар тӯли асрҳо рисолати таърихии хешро ба ҳайси ифодагари маънавиёту ахлоқ, зимни вижагиҳою рангомезии лаҳнияш аз замони бостон то кунун иҷро кардааст. Аз сарчашмаҳои таърихӣ бармеояд, ки маҳфуми фалак ифодагари осмон, кайҳон, сипеҳру афлок, гардун, гардиши рӯзгор, сарнавишт ва амсоли ин будааст.
Аз ин лиҳоз, имрӯз жанри мусиқии классикии Фалак ҳамчун падидаи нодири ҳунарӣ дар фазои соҳибистиқлолии кишвар бо ҷилову садои хеш танинандоз гардидааст.
Мо, ворисони ин ганҷи бебаҳои маънавии ниёгон, бояд онро ҳамчун падидаи пурарзиши фарҳангӣ ҳифз намуда, баҳри рушду нумуи жанру муҳтавои он кӯшиш намоем.