Таҷлили Рӯзи Рӯдакӣ дар боғи Рӯдакӣ

 
Душанбе, 22.09.2014. (АМИТ «Ховар», Зарангези Латиф).- Имрӯз аҳли ҷомеа хотираи сардафтари адабиёти тоҷику форс, Одам-уш-шуаро устод Абӯабдуллоҳи Рӯдакиро гиромӣ медоранд. Дар ин рӯз дар сар то сари макотиби ҷумҳурӣ Рӯзи Рӯдакихонӣ доир мешавад.
Таҷлили Рӯзи устод Рӯдакӣ башоратгари ифтихор аз фарзанди бузурги миллати тоҷик аст, ки дар осмони назми ҷаҳони мутамаддин дурахшонтарин ситора маҳсуб ёфта, эҷодиёташ барои тарбияи маънавиёту инсонгароӣ, ҳисси ватандӯстӣ, хештаншиносиву худогоҳӣ ва ҳуввияти миллии насли наврас ва ҷавон манбаи беназир аст.
Ҳамчунин баҳри ифтихормандӣ аз ва бузургдошти фарзанди бузурги миллат бо ташаббуси Вазорати фарҳанги Ҷумҳурии Тоҷикистон имрӯз соати 18:00 дар назди пояи муҷассамаи устод Рӯдакӣ бо иштироки шоирон Камол Насрулло, Аскар Ҳаким, Муҳаммад Ғоиб маҳфили шеърхонӣ ва барномаи консертӣ таҳти роҳбарии Ҳунарманди мардумии Ҷумҳурии Тоҷикистон Афзалшо ва дигар ҳунармандон баргузор мегардад.