Таҷрибаомӯзии донишҷӯёни ДДХ дар Помир

Душанбе, 08.09.2014. (АМИТ «Ховар», Раъно Нусратуллозода).-Бо мақсади ба пояи устувор гузоштани дониши амалии донишҷӯёни факултаи география-экологияи Донишгоҳи давлатии Хуҷанд (ДДХ) ба номи академик Бобоҷон Ғафуров ва омӯхтани гуногуннамудии сарватҳои табии Ҷумҳурии Тоҷикистон бо дастгирии бевоситаи раёсати донишгоҳ 14 нафар донишҷӯ бо роҳбарии профессор Садриддин Абдураҳимов, ки баҳри экспедитсияи илмӣ-тадқиқотӣ ба Помири шимолӣ рафта буданд, омада, онро натиҷагирӣ намуданд.

Тавре ки  сардори Маркази омӯзиши офатҳои табиӣ ва техногении донишгох, профессор Садриддин Абдураҳимов иттилоъ дод, ин таҷрибаомӯзӣ  аз 1-уми июл то 18-уми июли соли равон идома ёфт. Дар ин экспедитсия донишҷӯён аз Хуҷанд бо воситаи гузаштан аз  қаторкӯҳҳои Туркистон, Зарафшон, Ҳисор — дар қисми ҷануби шарқии  қаторкӯҳи Қаротегин ва водии Вахши деҳаи Яхч қарор гирифтанд. Донишҷӯён дар сатҳи болоии кӯҳпораи кандашуда ба омӯхтани ҳолати имрӯзаи он  машғул шуданд. Бо мусоидати масъулини  ҷамоати деҳаи Ҳоит бахшида ба 65-солагии заминларзаи Ҳоит дар байни аҳолӣ оид ба бавуҷудоии офатҳои табиӣ, сабабҳои он ва усулҳои пешгирӣ кардан бо аҳолӣ суҳбатҳо ороста шуданд. 
Ёдовар мешавем, ки чанде қабл 17 нафар донишҷӯи курси 3-юми ихтисосҳои география, география-демография, географияи сайёҳӣ  ва менеҷменти  саёҳат барои гузаронидани таҷрибаомӯзии таълимӣ байни минтақавии табию иқтисодӣ ба  минтақаҳои таҷрибаомӯзии ба шаҳру ноҳияҳои Шаҳристон, Айнӣ, Душанбе, Ваҳдат, Норак сафарбар  шудаанд. Ҷоиз ба зикр аст, ки 10 сол муқаддам чунин анъана буд, ки донишҷӯён имкони таҷрибаомӯзӣ ва боздид аз ҷойҳои таърихии манотиқи гуногуни кишварро доштанд. Хушбахтона, ин анъана соли ҷорӣ бо дастгирӣ ва пуштибонии Раёсати донишгоҳ аз нав эҳё гардид.