Таъсиси бонк бо низоми бонкдории исломӣ дар Тоҷикистон

Душанбе, 18.09.2014. (АМИТ «Ховар», Мавчуда Анварӣ).- «Давлати Қатар омода аст, ки бо Тоҷикистон дар бахшҳои бонкдорӣ, суғурта, тандурустӣ ҳамкориро тақвият дода, дар татбиқи лоиҳаҳои судбахши ин кишвар иштироки фаъол дошта бошад. Мо тасмим гирифтаем, ки дар Ҷумҳурии Тоҷикистон як бонк бо низоми бонкдории исломӣ таъсис диҳем»-гуфт ба хабарнигорон  пас аз мулоқот бо Президенти кишвар Эмомалӣ Раҳмон раиси Шӯрои директорони ҳолдинги «Издон»-и Давлати Қатар шайх Холид ибни Сонӣ оли Сонӣ.
Шайх Холид ибни Сонӣ оли Сонӣ аз ҷумла зикр намуд, ки ҳайати ҳамроҳони ӯ бахшҳои гуногуни иқтисодиёти Қатарро намояндагӣ мекунанд. «Мо бозор ва имкониятҳои сармоягузории Ҷумҳурии Тоҷикистонро омӯхтем, ки ин имкониятҳо умедбахшанд ва моро барои ҳамкории минбаъда водор месозад. Дар доираи ҳамкориҳои ҳарду кишвар мехоҳам ширкатҳои Қатарро ба бозори Тоҷикистон ҷалб намоям», — таъкид намуд шайх Холид.
Ба ақидаи шайх Холид ибни Сонӣ оли Сонӣ: «Дар байни кишварҳои мусулмон Ҷумҳурии Тоҷикистон як манзалати хос дорад. Масалан, дар тамоми хонадони Давлати Қатар китоби Саид ал-Бухорӣ вуҷуд дорад.