Таъсиси марказҳои дарёфт ва рушди истеъдодҳо

Душанбе, 01.09.2014. (АМИТ «Ховар», Бекназари Абӯбакр). — Аз ҷониби Ҳукумати Тоҷикистон барои дарёфт ва тарбияи хонандагони лаёқатманд дар шаҳру ноҳияҳои гуногуни кишвар то имрӯз 8 мактаби президентӣ таъсис дода шуд. Ин нуктаро 1 сентябр Сарвари давлат Эмомалӣ Раҳмон зимни суханронии хеш бахшида ба Рӯзи дониш зикр намуд.
Президенти кишвар афзуд, ки соли ҷорӣ ҳамчунин Ҳукумати мамлакат “Барномаи давлатии дарёфт ва рушди истеъдодҳо барои солҳои 2015-2020”-ро қабул намуд. Татбиқи барномаи мазкур имконият медиҳад, ки дар шаҳру ноҳияҳо марказҳои таълимиву илмии махсус ва марказҳои эҷодиёти техникӣ барои хонандагони лаёқатманд таъсис дода, дар онҳо шароити муосири таълиму тарбия муҳайё шаванд.
«Аз ин рӯ, ба мақомоти иҷроияи ҳокимияти давлатии вилоятҳо ва шаҳру ноҳияҳо супориш дода мешавад, ки дар доираи барномаи мазкур дар марказҳои вилоятҳо ва шаҳру ноҳияҳо марказҳои дарёфт ва рушди истеъдодҳоро таъсис диҳанд», — таъкид намуд Сарвари Давлат Эмомалӣ Раҳмон.