Тирандозони Тоҷикистон ба Кореяи Ҷанубӣ сафар намуданд
Душанбе, 16.09.2014. (АМИТ «Ховар», Лайло Тоирӣ).- 11 нафар варзишгари тирандози Тоҷикистон, ки дар Клуби ҷумҳуриявии варзиши тирандозии Ташкилоти ҷамъиятии мададгори мудофиаи Ҷумҳурии Тоҷикистон машқ мекунад, барои иштирок дар бозиҳои ҳабдаҳуми Осиё ба Кореяи Ҷанубӣ сафар намуд. Онҳоро дар ин сафар мураббиёни Клуби ҷумҳуриявии варзиши тирандозӣ Олег Набиев ва Дилором Лагутенко ҳамроҳӣ менамоянд. Бозиҳои ҳабдаҳуми Осиё аз 17 то 26 — сентябри соли ҷорӣ доир мегарданд.
Варзишгарони ташкилот барои иштироки сазовор дар ин чорабинӣ ва ҳифзи эътибори варзишии Тоҷикистон тамрини худро пурра анҷом доданд.
Ҳоло ташкилотҳои ҷамъиятии мададгори мудофиаи вилоятҳои Суғду Хатлон низ дастаҳои мунтахаби варзишгарони худро доранд, ки дар мусобиқаҳои сатҳи ҷумҳуриявӣ ва минтақавӣ иштирок намуда, пайваста мақомҳои сазоворро соҳиб мегарданд. Бояд гуфт, ки шумори духтарону бонувони ба ин риштаи варзиш майл пайдонамуда торафт рў ба афзоиш аст.