Туҳфаи А. Қодирӣ ба мактаби деҳаи Мусаффо
Душанбе, 17.09.2014. (АМИТ «Ховар», Мавҷуда Анварӣ).- Дирӯз дар деҳаи Мусаффои ҷамоати деҳоти Унҷии ноҳияи Бобоҷон Ғафуров бинои навбунёди иловагии мактаби таҳсилоти миёнаи умумии рақами №29 мавриди истифода қарор гирифт.
Тавре ки аз Хадамоти матбуоти раиси вилояти Суғд иттилоъ доданд, бинои нави иловагии мактаб бо харҷи 2 миллиону 80 ҳазор сомонӣ сохта шуда, он дар як баст барои 240 нафар хонанда пешбинӣ гардидааст.
Дар расми ифтитоҳи ин иншоот муовини раиси вилоят Раъно Маҳмудзода таъкид дошт, ки ифтитоҳи бинои иловагӣ дар мактаби таҳсилоти миёнаи умумии рақами 29 намунаи олии ғамхориҳои давлат ва ҳукумат маҳсуб меёбад. Мавсуф аз ҳозирин даъват ба амал овард, ки дар азхудкунии касбу ҳунарҳои мардумӣ, донистани забонҳои хориҷӣ кӯшиш ба харҷ диҳанд. Номбурда ҳамчунин бобати муҷаҳҳаз гардонидани синфхонаҳои ташхисӣ, баланд бардоштани завқи хонандагон ба фанҳои дақиқ ва ба ин васила омода кардани хонандагон ба касбҳои соҳаи кӯҳкориву муҳандисӣ дастуру тавсияҳо дод.
Раъно Маҳмудзода дар вазъияти тантанавӣ туҳфаи раиси вилояти Суғд Абдураҳмон Қодириро, ки иборат аз компютер ва принтер бо тамоми таҷҳизоташ буд, ба сарвари мактаб супорид.