Владимир Путин вориди пойтахти Тоҷикистон шуд

Душанбе, 11.09.2014 (АМИТ «Ховар», Бекназари Абӯбакр). — Президенти Федератсияи Русия Владимир Путин барои иштирок дар ҷаласаи Шӯрои сарони давлатҳои аъзои Созмони Ҳамкории Шанхай, ки 11 ва 12 сентябр дар шаҳри Душанбе доир мегардад, пас аз зуҳри имрӯз вориди пойтахти Тоҷикистон шуд. 
Меҳмони олиқадр-Владимир Путинро дар фурудгоҳи байналмилалии Душанбе Сарвазири Ҷумҳурии Тоҷикистон Қоҳир Расулзода, вазири корҳои хориҷии Тоҷикистон Сироҷиддин Аслов ва дигар шахсони расмӣ пешвоз гирифтанд.  

Маврид ба зикр аст, ки 6 кишвар – Ҷумҳурии Қазоқистон, Ҷумҳурии Қирғизистон, Ҷумҳурии Мардумии Чин, Федератсияи Русия, Ҷумҳурии Тоҷикистон ва Ҷумҳурии Ӯзбекистон узви комилҳуқуқи ин созмон буда, мутобиқи санадҳои расмии он Раёсати Созмон ҳар сол аз як давлат ба давлати дигар мегузарад. Ҳамин тавр, бо баргузории ҷаласаи Шӯрои сарони давлатҳои аъзои СҲШ (11-12 сетябри соли 2014) раёсат Тоҷикистон дар ин созмони бонуфуз поён ёфта, он ба Федератсия Русия мегузарад.