“Водии Рашт — имкониятҳои рушд”-анҷумани байналмилалӣ
Душанбе, 26.09.2014. (АМИТ “Ховар”, Мавҷуда Анварӣ).- Аз 25 то 26 сентябри соли ҷорӣ дар ноҳияи Рашт бо ташаббуси Вазорати рушди иқтисод ва савдои Ҷумҳурии Тоҷикистон ҷиҳати мусоидат намудан дар рушди иҷтимоию иқтисодии ҷумҳурӣ, аз ҷумла рушди иҷтимоию иқтисодии ноҳияҳои Рашт, Нуробод, Ҷиргатол, Тавилдара ва Тоҷикобод анҷумани байналмилалии иқтисодии “Водии Рашт — имкониятҳои рушд” баргузор гардид.
Тавре ки Нуралӣ Шоқурбонов, сардори маркази матбуоти Вазорати рушди иқтисод ва савдо ба хабарнигори АМИТ “Ховар” иброз намуд, мақсад аз баргузории ин чорабинӣ мониторинг, арзёбӣ ва ҳамоҳангсозии лоиҳаҳои гуногуни дар минтақаи мазкур татбиқшаванда, баррасии ҷараёни иҷрои нақшаи чорабиниҳои барномаҳои давлатии рушди иҷтимоию иқтисодии ноҳияҳои водии Рашт, муаррифии имкониятҳои сармоягузорӣ ва беҳтар намудани шароит барои рушди соҳибкорӣ мебошад.
Кори анҷуманро вазири рушди иқтисод ва савдо — Шариф Раҳимзода ифтитоҳ намуда, зикр кард, ки дар айни замон панҷ ноҳияи минтақаи Рашт дорои барномаҳои рушди ноҳия мебошад. Таҳлили барномаҳои рушди иҷтимоию иқтисодии ноҳияҳои Рашт, Нуробод, Ҷиргатол, Тавилдара ва Тоҷикобод нишон медиҳад, ки то соли 2017 танҳо дар доираи барномаҳои мазкур ба рушди иҷтимоию иқтисодии минтақа ба маблағи 800 млн. сомонӣ ҷалб ва зиёда аз 720 лоиҳа татбиқ хоҳад шуд. Аз ҷумла, ба соҳаҳои ҳақиқии иқтисодиёт тибқи барномаҳои рушд 65,2 млн. сомонӣ, иҷтимоиёт 239,5 млн. сомонӣ, инфрасохтор 451,3 млн. сомонӣ, ҳолатҳои фавқулода ва ҳифзи муҳити зист 16,8 млн. сомонӣ ва дигар соҳаҳо зиёда аз 21 млн. сомонӣ маблағгузорӣ хоҳад шуд.
Дар ҳошияи баргузории анҷумани мазкур ва татбиқи барномаҳои минтақа, иброз гардид, ки дарёфти маблағҳои зарурӣ ва татбиқи пурраи барномаҳои рушд талаб менамояд, мақомоти иҷроияи маҳаллии ҳокимияти давлатии ноҳияҳо ҳамкориро бо вазорату идораҳои дахлдори ҷумҳурӣ, ташкилотҳои байналмилалӣ ва бахши хусусӣ ҷоннок намуда, татбиқи барномаи рушди ноҳияро дар сатҳи зарурӣ ба роҳ монанд.
Дар Анҷумани мазкур ҳамчунин намоишгоҳи молу маҳсулоти кишоварзию саноатӣ ва маҳсули ҳунарҳои мардумӣ, стендҳои маълумотӣ дар бораи лоиҳаҳои татбиқшудаистодаи давлатӣ ва ғайридавлатӣ дар ноҳияҳои водии Рашт гузаронида шуд.