Вохӯрӣ бо соҳибкорони Хатлон

Душанбе, 20.09.2014. (АМИТ «Ховар», Мавҷуда Анварӣ).- Ҳайати иқтисодии иборат аз мутахассисони бахшҳои рушди иқтисод, гумрук, низоми андозбандӣ, соҳибкорӣ, бонкдорӣ ва роҳбарони идораю муассисаҳои дахлдори ҷумҳурӣ бо мақсади тақвият бахшидани бахши соҳибкорӣ дар шаҳри Қӯрғонтеппа бо соҳибкорони вилояти Хатлон вохӯрд. 
Дар вохӯрӣ зикр гардид, ки ҳарчанд солҳои охир соҳибкорӣ дар  вилоят дар ҳоли рушд аст, мушкилиҳои ҷиддие мавҷуданд, ки ба вусъати бештари он монеъ мешаванд. Таъкид гардид, ки рафъи монеаҳои сунъии маъмурӣ, низоми номақбули ниёзмандии доимии соҳибкорон ба амалдорон, ворид намудани тағйирот ба қонунгузории кишвар оид ба дастгирии давлатии бахши соҳибкорӣ ба рушди соҳа мусоидат мекунанд.  
Давлатшо Гулмаҳмадзода, раиси вилоят соҳибкоронро даъват намуд, ки бо такя ба қонунҳои кишвар ба рафъи мушкилот ва ноил шудан ба дастовардҳои назаррас камар банданд.