Зойирини тоҷик дар масҷиди Набавӣ намоз гузоштанд

 
Душанбе, 22.09.2014. (АМИТ «Ховар», Мавҷуда Анварӣ).- То имрӯз, 22-юми сентябр беш аз 60 фоизи ҳоҷиёни тоҷик ба Мамлакати Арабистони Саудӣ барои адои маносики ҳаҷ сафар намуданд. 
Дар ин бора сардори маркази матбуоти Кумитаи оид ба корҳои дин Афшини Муқим аз Арабистони Саудӣ ба хабарнигори АМИТ «Ховар» хабар дод.
Тибқи иттилои А. Муқим, зоироне, ки аз вилояти Суғд ва баъзе аз шаҳру навоҳии дигар аз самти Душанбе ба Мадинаи мунаввара парвоз карданд, баъди 6 рӯзи иқомат ва гузоштани намоз дар масҷиди Набавӣ ба Маккаи Мукаррама баргаштанд. 
Мутобиқи ҳиссаи ҷудонамудаи Мамлакати Арабистони Саудӣ имсол аз Тоҷикистон беш аз 6 ҳазор нафар ба зиёрати хонаи Худо мушарраф хоҳанд шуд.
Ёдовар мешавем, ки нахустин парвози ҳаҷравандагон аз Ҷумҳурии Тоҷикистон ба Арабистони Саудӣ рӯзи 10- уми сентябри соли ҷорӣ оғоз шуда, то 28-уми сентябр идома меёбад. 
Дар маҷмӯъ аз самти Душанбе — Мадина ва Душанбе — Ҷидда  33 парвоз анҷом дода мешавад, ки тамоми зоирин дар муддати муайян ба кишвари Саудӣ сафарбар мешаванд.