Ҳафтаи Аврупо -2014 дар Тоҷикистон

Душанбе, 15.10.2014. (АМИТ «Ховар», Марҳабои  Азамат). — Бо  ибтикори Намояндагии Иттиҳоди  Аврупо  дар  Тоҷикистон  аз  25  октябр  то  2  ноябр  дар  шаҳри  Душанбе  ва ноҳияи  Варзоб Ҳафтаи  Аврупо   баргузор  мегардад. Хабарнигори АМИТ «Ховар» дар  ҷараёни нишасти  матбуотӣ  дар  Маркази  фарҳанги  «Бохтар» аз ин  иқдомот  воқиф  гардид. 
Ба  гуфтаи  раиси  Маркази фарҳанги «Бохтар» Тимоте Маёйр,  барномаи  Ҳафтаи  Аврупо  бархе чорабиниҳоро  дар  бар  мегирад. 
Аз ҷумла,  дар  ҷараёни  ҳафта доир  намудани  намоишгоҳи асарҳои  рассомони Аврупо  бо  истифода  аз  хазинаи  Осорхонаи   миллии  Тоҷикистон, консерт аз  асарҳои  бастакорони Аврупо  дар  иҷрои  устодони  санъати  Тоҷикистон  дар  Театри опера  ва  балети  ба  номи  С.Айнӣ,  намоишгоҳи суратҳо таҳти  унвони «Манзараҳои  Душанбе» ва  ғайра  дар  назар  аст. 
Намояндаи  Маркази  фарҳанги  «Бохтар» Амалхонум Ҳоҷиева  дар  навбати худ  хотирнишон  сохт, ки созмони  IDEA, намояндагии Швейтсария,  сафорати  Фаронса  дар  Тоҷикистон, Вазорати  фарҳанги  ҶТ  ва  ширкати  BEELINE (Белайн) мушорикони маркази  мазкур  дар  ин  лоиҳа  ба  шумор  мераванд. 
Ёдовар  мешавем, ки дар  нишасти  матбуотӣ  ҳамчунин  роҳбари  навтаъйини  Намояндагии  Иттиҳоди  Аврупо  дар  Тоҷикистон  сафир  Ҳидоят Бишчевич,  сафири  Олмон  дар  ҶТ Ҳолгер Грин, мушовири  масоили  матбуот ва  иттилооти  Намояндагии  Иттиҳоди  Аврупо  дар  ҶТ  Маҳбуба  Абдуллоева  ширкат  доштанд.