Барномаи «Соли 2014 -соли роҳҳои обод» дар амал

Панҷакент, 3.10.2014. (АМИТ «Ховар», Гулбаҳори Худойбердӣ).- Дар шаҳру навоҳии вилояти Суғд Барномаи «Соли 2014 — соли роҳи обод» бо маром идома дорад. Кормандони Муассисаи давлатии нигоҳдории роҳҳои мошингарди шаҳри Панҷакент низ дар асоси ин барнома бунёд, таъмир ва ҳифзи роҳҳои маҳаллиро роҳандозӣ мекунанд. Барои сохтмон, таъмир ва таҷдиди роҳҳои мошингард сармоягузорони дохиливу хориҷӣ, соҳибкорон ва роҳбарони корхонаву ташкилотҳо ҷалб гардидаанд. 
    Тавре ки сарвари муассиса Фахриддин Муъминов зикр кард, дар 9 моҳи сипаришуда аз ҳисоби соҳибкорон ва шаҳрвандон 85 километр роҳи мошингарди байни хоҷагиҳо ҳамвор ва шағалпӯш гардида, кӯчаҳои Отахон Латифӣ, «50- солагии Тоҷикистон», Саъдии Шерозӣ, Лоиқ Шералӣ, Деваштич аз таъмири ҷорӣ бароварда шуданд. Таҷдид ва таъмири кӯчаи Ҷалолуддини Румӣ ба ҳусни шаҳр таровати тоза бахшид. Ҳоло мумфаршкунии кӯчаи Навобод идома дорад. Дар ин давра бо сарпарастии ҶДММ КМ «Зарфшон» роҳи мошингарди  Суғдиён-Сӯфиён ва бо дастгирии молиявии корхонаи БРОАДТЕК роҳи Кулолӣ — Зимтӯд ва 2 пул аз таъмири ҷорӣ бароварда шуд. Бо иқдоми роҳбарияти Ҷамъияти матлуботи шаҳри Панҷакент дохили бозори марказӣ мумфарш гардид. Инчунин аз ҳисоби маблағгузории Вазорати нақлиёти Ҷумҳурии Тоҷикистон 2 адад пули роҳи мошингарди Дуоба — Фароб таъмир шуд.
   Зимни суҳбат Фахриддин Муъминов иброз намуд, ки тибқи нақшаи пешбинишуда аз ҳисоби буҷети маҳаллӣ 4 километр ва аз ҳисоби таҷдиди роҳи мошингарди Айнӣ-Панҷакент 30 километр роҳи маҳаллӣ барқарору навсозӣ мешавад.