Боздиди Р.Қодиров аз МОИ «Суғд»

Душанбе, 01.10.2014. (АМИТ «Ховар», Лайло  Тоирӣ). – 30  сентябр  роҳбарияти  маъмурияти Минтақаи  озоди  иқтисодии  «Суғд»  бо  роҳбари  намояндагии  Бонки  рушди  АвруОсиё  дар  Тоҷикистон  Рашид  Қодиров  мулоқот анҷом  дод. 
Назар  ба  хабари  маркази  матбуоти Минтақаи  озоди  иқтисодии «Суғд»,  мавзӯи  мулоқот иборат  аз  пешниҳодҳо  дар  амри  сармоягузорӣ  ва  ҳамкорӣ  барои татбиқи  лоиҳаҳои  хушсифат  буд. 
Р.Қодиров  зикр  намуд, ки Бонки  рушди  АвруОсиё вазифадор  аст ба  рушди  иқтисодиёти  давлатҳои  узви  бонк,  густариши  равобити тиҷоратиию  иқтисодии  байни  онҳо  ва  вусъати  равандҳои  ҳамгироӣ  дар  фазои  АвруОсиё  бо  василаи  сармоягузорӣ  мусоидат  кунад. 
Ёдовар  мешавем, ки  Арманистон,  Беларус,  Қазоқистон, Қирғизистон,  Русия  ва  Тоҷикистон  иштирокдорони  бонк  ба  шумор  мераванд. 
Дар  анҷоми  мулоқот   иштирокдорони он   аҳд  карданд, ки  имконияти   ҳамкории  минбаъда  барои  татбиқи  лоиҳаҳои  мавҷударо  баррасӣ  намоянд. 
Рашид  Қодиров  ҳамчунин  бо  муовини  раиси  вилояти  Суғд Ановар Яқубӣ гуфтушунид  кард.