Э. Раҳмон: “Ба мо таҷрибаи мамлакатҳои тараққикарда ҷолиб аст”

Душанбе, 15.10.2014. (АМИТ “Ховар”, Бекназари Абӯбакр). — “Бо мақсади кам кардани таъсири манфии таҳдидҳои глобалӣ, аз ҷумла оқибатҳои баъдибуҳронии молиявию иқтисодӣ, хавфи зиёдшавии сатҳи камбизоатӣ, дастрасии маҳдуди мардум ба оби тоза, озуқаворӣ, нерўи барқ ва дигар маҳсулоту хизматрасониҳои ниёзи аввал, паҳншавии бемориҳои сирояткунанда, тағйирёбии иқлим ва тамоюлҳои зудтағйирёбандаи ҷаҳониву минтақавӣ, густариш ва таҳкими робитаҳои иқтисодии берунӣ бо ҳамаи мамлакатҳои ба мо дўст ва шарик вазифаи муҳимтарини сиёсати иқтисодии хориҷии кишвари мо  мебошад”, — гуфт Президенти Тоҷикистон Эмомалӣ Раҳмон 15 октябр зини суханронии хеш дар дар Форуми иқтисодӣ ва сармоягузории Душанбе — 2014 таҳти унвони «Соҳибкорӣ  муҳаррики иқтисодиёт».
Ба таъкиди Сарвари Давлат густариши ҳамкории созанда бо якдигар дар сатҳҳои дуҷониба ва бисёрҷониба воситаи муҳимтарини ҳалли масъалаҳои иқтисодиву иҷтимоӣ, амниятиву экологӣ ва муқовимат бо таҳдиду хатарҳои глобалии муосир буда, ба манфиатҳои тамоми ҷомеаи ҷаҳонӣ ва ҳар як кишвари ҷаҳон комилан ҷавобгў мебошад.
“Барои мо таҷрибаи мамлакатҳои тараққикарда ва рў ба тараққӣ, ки ба бахши хусусии онҳо қариб 80 фоизи маҷмўи маҳсулоти дохилӣ ва на камтар аз 70 фоизи шуғли аҳолӣ рост меоянд, хеле ҷолиб мебошад”, — тазаккур дод Э. Раҳмон.