Фаъолияти иқтисодчиён таҳти муқаррароти Қонуни нави забон

Душанбе, 8.10.2014. (АМИТ “Ховар”, Мавҷуда Анварӣ).-  Дар ҷамъомади тантанавие, ки дар Вазорати рушди иқтисод ва савдо бахшида ба Рӯзи забони давлатии Ҷумҳурии Тоҷикистон баргузор гардид, узви Иттифоқи нависандагони ҷумҳурӣ, шоираи шинохтаи тоҷик, барандаи Ҷоизаи адабии ба номи Мирзо Турсунзода Шаҳрияи Аҳтамзод ширкат варзид.
Муовини аввали вазири рушди иқтисод ва савдо Неъматҷон Буриев ҳозиринро бо Рӯзи забони давлатӣ табрик карда, гуфт, ки дар солҳои истиқлолияти Тоҷикистон ба забони давлатӣ таваҷҷуҳу ғамхории зиёде зоҳир мешавад. Дар масъалаи омӯхтани забон, гиромӣ доштани забони модарӣ Президенти ҷумҳурӣ Эмомалӣ Раҳмон аҳамияти махсус дода, дар суханрониҳо ва вохӯриҳои сершумори худ муҳимияти ин масъаларо таъкид менамояд.
Зикр шуд, ки дар Вазорати рушди иқтисод ва савдо комиссияи татбиқи Қонуни забон пурсамар фаъолият дорад. Дар ҷаласаҳои Комиссия масъалаҳои муҳим вобаста ба коргузорӣ, тарҷумаю истифодаи дурусти истилоҳоти иқтисодӣ мавриди баррасӣ қарор мегиранд. Аъзои комиссия мақсад доранд, ки дар оянда низ таҳти муқаррароти Қонуни нави забон фаъолияти худро густурда ба роҳ монда, дар татбиқи он саҳми худро гузоранд. 
Шоираи нозукбаёни тоҷик Шаҳрияи Аҳтамзод ва сардори шуъбаи ташкилию ҳуқуқии Кумитаи забон ва истилоҳоти назди Ҳукумати ҷумҳурӣ Мансури Шодмон Ҷамолиддинзода дар бораи мақому мартабаи забони тоҷикӣ, татбиқи Қонун «Дар бораи забони давлатӣ», одоби муошират, истифодаи истилоҳоти соҳавӣ андешаҳои худро баён намуданд. Шоира Шаҳрияи Аҳтамзод ҳамзамон аз ашъори тозаэҷодаш дар васфи забон якчанд шеър қироат кард ва дар интиҳо байни кормандони вазорат ва меҳмонон оид ба паҳлӯҳои мухталифи татбиқи Қонуни ҶТ «Дар бораи забони давлатии Ҷумҳурии Тоҷикистон» суолу ҷавоб ва мубодилаи афкори судманд сурат гирифт.