Фармондеҳи қисми ҳарбӣ дубора муҷозот мешавад

Душанбе, 8.10.2014. (АМИТ “Ховар”, Мавҷуда Анварӣ).-  Фармондеҳи ротаи таълимии қисми ҳарбии 2613-и Қӯшунҳои сарҳадии Ҷумҳурии Тоҷикистон Сагизов Рустам Туйчиевич бо гирифтани пора дастгир шуд.
Тибқи иттилои маркази матбуоти Агентии назорати давлатии молиявӣ ва мубориза бо коррупсия, Р. Сагизов бо истифода аз мақоми хизматӣ бо роҳи фиреб ба боварии шаҳрванд Азимов даромада, барои интиқоли ҷияни ӯ аз қисми низомии Қӯшунҳои сарҳадӣ дар ноҳияи Ҳамадонӣ ба қисми ҳарбии гарнизони шаҳри Душанбе 600 доллари амрикоӣ гирифта, барои эҳтиёҷоти худ сарф кардааст.
Манбаъ илова намуд, ки дар айни ҳол фармондеҳи қисми ҳарбии сарҳадӣ бо қаллобӣ айбдор мешавад ва тафтиш дар ин самт идома дорад. 
Рустам Сагизов дорои маълумоти олӣ ва соҳиби 2 фарзанд буда, истиқоматкунандаи шаҳри Кӯлоб аст. Номбурда қаблан низ бо қаллобӣ  боздошт ва маҳкум гардида буд.