Курсҳои омӯзишии волонтёрӣ барои ҷавонон ва донишҷӯён

Душанбе, 08.10.2014 (АМИТ “Ховар”, Фарзонаи Давлат).- “Фаъолноксозии донишҷӯёни волонтёр барои узвият ба Иттифоқи ҷавонони Тоҷикистон”- таҳти чунин унвон тренинг-омӯзиши донишҷӯён ва ҷавонон ҳар ҳафта рӯзҳои шанбе  дар Маркази ҷумҳуриявии ҷавонон «Ориёно»  баргузор мегардад.
Тренинги мазкур бо ташаббуси Кумитаи ҷавонон, варзиш  ва сайёҳии назди Ҳукумати Ҷумҳурии Тоҷикситон баргузор гардида, дар он ҷавонон ва донишҷӯён иштирок мекунанд.
Бино ба иттилои Кумитаи мазкур, тренинги омӯзишӣ аз 4-уми октябри соли равон бо иштироки донишҷӯёни Донишгоҳи давлатии омўзгории Тоҷикистон оғоз гардид, ки Наимҷон Мирзораҳимов ба ҳайси тренер ба иштирокчиён ҳаракати волонтёрӣ,  шомил шудан ба ин ҳаракат ва дар доираи ин ҳаракат ба анҷом расонидани кадом корҳоро омўзонид.
Гуфта мешавад, ки дар курси кутоҳмудати омӯзишӣ беш аз 100 нафар донишҷӯни Донишгоҳи давлатии омӯзгории Тоҷикистон оид ба ҳаракати волонтёрӣ маълумотҳо дастрас кард, ки онро метавонанд дар фаъолияти шахсиашон истифода баранд. 
Ёдовар мешавем, ки ин тренингҳо ҳар ҳафта рўзи шанбе дар Маркази ҷумҳуриявии ҷавонон «Ориёно» доир мегарданд. Хоҳишмандон метавонанд дар курсҳои мазкур иштирок намуда, маълумотҳои заруриро оид ба ҳаракати волонтёрӣ дастрас намоянд.