Маҳдудияти неруи барқ дар баъзе манотиқ
Душанбе, 2.10.2014. (АМИТ “Ховар”, Мавҷуда Анварӣ).-Аз 1-уми октябр дар Тоҷикистон маҳдудияти истифодаи неруи барқ ҷорӣ шуд, ки ин ба пойтахт ва марказҳои маъмурии вилоятҳо ва навоҳии кишвар дахл надорад. «Аммо нақшаи аниқи маҳдудият барои истифодабарандагони барқ дар минтақаҳои кишвар тасдиқ нагардидааст»,- мегӯяд сухангӯи ширкати “Барқи Тоҷик” Нозирҷон Ёдгорӣ.
Ба гуфти Нозирҷон Ёдгорӣ, лимити барқи имсоларо низ на бо соат, балки бо киловатт-соат ҳисоб хоҳанд кард. Ҳадафи ҷорӣ кардани лимит ҳифзи оби обанбори Норак — манбаи асосии тавлиди барқи Тоҷикистон дар сурати сард омадани фасли сармост.
Зикр кардан ба маврид аст, ки дар обанбори НБО Норак сатҳи ҷараёни оби дарёи Вахш имсол нисбат ба соли гузашта паст аст. Маҷрои об дар обанбори он ҳоло 447 метри мукааб дар сонияро ташкил медиҳад. Дар ҳоле ки як сол пеш дар чунин давра он 547 метри мукааб дар сония будааст. Аз ин рӯ, лимит аз ҳоло ҷорӣ шуд, то дар зимистон мардум бебарқ намонад.
Хотиррасон мекунем, ки тибқи анъана лимити барқ ҳар сол аз моҳи октябр дар тамоми ноҳияҳои берун аз пойтахт ба ҷуз аз марказҳои маъмурӣ ва шаҳрҳо ҷорӣ мешавад.