Намошгоҳи IV байналмилалии китоби Душанбе

Душанбе, 03.10.2014.(АМИТ «Ховар», Раъно Нусратуллозода).-Дирӯз дар Наврӯзгоҳи пойтахт намоишгоҳи чоруми байналмилалии  китоби Душанбе бо иштироки 9 давлат ва 78 интишороти ватаниву хориҷӣ ба кори худ шурӯъ кард. 
Тавре ки директори намоишгоҳи мазкур Наҷмиддин Зайниддинов иттилоъ дод, дар намоишгоҳ зиёда аз 10 ҳазор номгӯй китоби тозанашри интишорот бо теъдоди 31 ҳазор нусха ба маърази ҳаводорони каломи бадеъ гузошта шуд.
Дар намоишгоҳи китоб вазири фарҳанги Ҷумҳурии Тоҷикистон Шамсиддин Орумбекзода, муовини раиси Иттифоқи  нависандагони Тоҷикистон  Абдулҳамид Самад сухан гуфта, зикр намуд, ки таваҷҷуҳи Ҳукумати ҷумҳурӣ ба нашри босифати китоб, зиёд намудани мағозаҳои китобфурӯшӣ, ташкили корвонҳои китоб дар манотиқи гуногуни ҷумҳурӣ меафзояд ва ин имкон медиҳад, ки ба ин васила сафи дӯстдорони китоб  зиёд шавад.
Имрӯз намоишгоҳи чоруми байналмилалии  китоби Душанбе ҷамъбаст мегардад.