Президент 14 октябрро Рӯзи соҳибкорон эълон кард

Душанбе, 14.10.2014.(АМИТ «Ховар», Марзия Саидзода).- Минбаъд 14 октябр дар Ҷумҳурии Тоҷикистон Рӯзи соҳибкорон таҷлил  мешавад. Президенти Ҷумҳурии Тоҷикистон Эмомалӣ Раҳмон зимни мулоқоташ бо соҳибкорон ва саромоягузорони кишвар, ки 14 октябр дар муҷтамаи давлатии «Кохи Борбад» доир гардид,  гуфт, ки : «Ба хотири заҳматҳои кашидаи шумо дар роҳи ободии Ватан ва ҳамчун рамзи дастгирии фаъолияти содиқонаву софдилонаатон 14 — уми октябр дар мамлакат рӯзи соҳибкорон эълон карда шавад».        
          Сарвари кишвар зимни суханронияш соҳибкорону сармоягузоронро қувваи бузургу пешбарандаи иқтисодиёти кишвар ва неруи созандаву ободкори Ватанамон  арзёбӣ намуда, таъкид кард, ки: «Ҳадафи асосии мулоқот бо соҳибкорону сармоягузорон табодули афкор бо мақсади идома додани ислоҳот ва густариши он ҷиҳати беҳтар намудани фазои сармоягузорӣ ва соҳибкорист».