Сардори давлат ҷонибдори густариши муколамаи давлат ва бахши инфиродӣ

Душанбе, 15.10.2014. (АМИТ «Ховар», Муқаддас  Темурзода). — Президенти  Ҷумҳурии  Тоҷикистон  Эмомалӣ  Раҳмон  14  октябр  дар  ҷараёни  вохӯрӣ  бо  соҳибкорон  ва сармоягузорон  иброз  дошт, ки тайи  7  соли охир  дар  кишвар   беш аз 1600 корхонаю  коргоҳҳои   нави  саноатии  дорои  50  ҳазор  ҷойи  корӣ, аз  ҷумла   корхонаҳои   коркарди  минералҳо ва  намудҳои  дигари   ашёи  хоми  саноатӣ,   нахи  пахта,  истеҳсоли  маводи  сохтмонӣ,  коркарди  меваю  сабзавот  бунёд  гардида,  соҳибкорони  кишвар  як  худи  соли гузашта 332  корхонаҳои  нави истеҳсолиро  бунёд  карда  ва  мавриди  истифода  қарор  доданд. 
Президенти  кишвар мақоми  судманди  бахши  инфиродиро  дар  таъмини  рушди  босуръати  иқтисодиёти  ҷумҳурӣ, ободонӣ,  баланд  бардоштани  сатҳи  некуаҳволии  мардуми  кишвар амри  муҳим   дониста, мушорикат  ва ҷонибдории  худро ҷиҳати   густариши  муколамаи  давлат  ва бахши  инфиродӣ  иброз  дошт. 
Эмомалӣ  Раҳмон  афзоиши  теъдоди  ниҳодҳои   соҳибкорӣ  дар  амри  рушди  иқтисодиёти  кишварро   раванди  мусбат дониста,  зикр  намуд, ки  тайи  5  соли охир  теъдоди онҳо  аз 186,5 ҳазор  ба 293  ҳазор  расида,  умуман 57  фоизро ташкил  медиҳад. Президент дар  мавриди  фаъолияти  бахши  инфиродии  кишвар қайд  намуд, ки  соли  гузашта  ҳаҷми  маҳсулоти  умумӣ  дар  Ҷумҳурии  Тоҷикистон  40,5  миллиард  сомониро  ташкил  дод, ки  беш  аз  63  фоизи он  ба  бахши  инфиродӣ  рост  меояд.