Соҳибкорон- қувваи бузургу пешбарандаи иқтисодиёти кишвар
Душанбе, 14.10.2014 (АМИТ “Ховар”, Фарзонаи Давлат).- Имрӯз Президенти кишвар Эмомалӣ Раҳмон зимни мулоқот бо соҳибкорони ватанӣ дар «Кохи Борбад” гуфт, ки: «Мулоқоти мову шумо, ки дар соли таҷлили 23-юмин солгарди истиқлолияти давлатии Ватани азизамон ва 20-умин солгарди қабули Конститутсияи кишвар баргузор мегардад, маҳз ташаббускорӣ ва фаъолияти пурмасъули шумо моро водор сохт барои Форуми иқтисодӣ ва сармоягузорӣ, ки фардо баргузор мегардад, шиори “Соҳибкорӣ- муҳаррики иқтисодиёт”-ро интихоб намоем.
— Ҳамчунин имсол дар Тоҷикистон Шӯрои сарони давлатҳои узви Созмони ҳамкории Шанхай, Бизнес-форуми соҳибкорони мамлакатҳои узви ин созмон, мулоқоту вохӯриҳо бо роҳбарони сатҳи олии давлатҳои аъзои созмон баргузор гардиданд, ки ҳама, дар маҷмӯъ, ба рушд ва тақвияти ҳамкориҳои мутақобилан судманди иқтисодӣ ва фароҳам овардани шароити мусоид барои сармоягузорон мусоидат хоҳанд кард, таъкид кард Эмомалӣ Раҳмон дар мулоқот бо соҳибкорон.