Тақвияти тарбияи экологии хонандагон

Душанбе, 3.10.2014. (АМИТ “Ховар”, Мавҷуда Анварӣ).- Дар муассисаи таҳсилоти миёнаи умумии №24 –и шаҳри Душанбе мизи мудаввар дар мавзӯи «Ҳамоҳангсозии фаъолияти мактаб ва муассисаҳои иловагӣ дар таълими экологии хонандагон» баргузор гардид. 
Дар ҷараёни мизи мудаввар муовини директори Маркази ҷумҳуриявии муассисаҳои таҳсилоти иловагии Вазорати маориф ва илми ҷумҳурӣ Ғ. Қараев дар маърӯзаи хеш муаммоҳои маърифати экологиро чун қисми таркибии таълиму тарбияи экологии хонандагон дар мактаб баррасӣ намуда, роҳҳои ривоҷ додани ин фаъолиятро ба иштирокчиён пешниҳод кард.
Сардори иттиҳодияи ҷамъиятии Маркази экологии ҷавонон Ю. Скочилов ба толибилмон истифодаи маводи мултимедиявӣ, аз ҷумла истифодаи «Пакети сабз»-ро дар таълими экологии хонандагон нишон дод, ки ба ҳалли муаммоҳои экологии Ҷумҳурии Тоҷикистон ва оқилона истифода бурдани захираҳои табиӣ бахшида шудаанд. Ҳамзамон корманди маркази ахбори экологии Кумитаи ҳифзи муҳити зист С. Содиқова оид ба фаъолияти кумита ҷиҳати баланд бардоштани маърифати экологии муҳассилини макотиби умумӣ, гузаронидани озмунҳою семинарҳо ва ҳамкорӣ бо Вазорати маориф ва илми ҷумҳурӣ, обуна ба рӯзномаи «Инсон ва табиат» ва маҷаллаи «Ҳифзи табиат» ҳарф зад.
Дар анҷом аъзои маҳфили «Экологҳои ҷавон»-и мактаби №24 дар назди иштирокдорон барномаи фарҳангӣ оид ба экология ва ҳифзи муҳити зист-ро намоиш доданд.