Таҷлили Рӯзи забони давлатӣ дар «Тоҷикстандарт»

Душанбе, 3.09.2014. (АМИТ «Ховар»). — Имрӯз дар Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон бахшида ба Рӯзи забони давлатӣ чорабинӣ доир гардид. Дар ин чорабинӣ кормандони дастгоҳи марказии Агентӣ ва намояндагони Кумитаи забон ва истилоҳот иштирок намуданд. Директори Агентии «Тоҷикстандарт» Бахтиёр Шукурзода доир ба таърихи забони давлатӣ, мақому манзалати он дар худшиносиву худогоҳии миллӣ ва татбиқи босамари қонуни забони давлатӣ дар «Тоҷикстандарт» маърӯза кард. Сипас, мудири бахши экспертизаи забоншиносии Кумитаи забон ва истилоҳот Маҳмад Муродов ва мутахассиси ҳамин бахш Амирҳамза Сатторов доир ба паҳлуҳои гуногуни татбиқи қонуни забони давлатӣ, бахусус дуруст истифода бурдани калимот, тарзи ҳуҷҷатгузорӣ ва амсоли инҳо баромад намуданд.