Тахсиси 250 миллион евро барои иқтисодиёти ҶТ

Душанбе, 17.10.2014. (АМИТ «Ховар», Марҳабои  Азамат). –  Иттиҳоди  Аврупо  тайи  5  соли наздиктарин  барои иқтисодиёти  Тоҷикистон  250  миллион  евро ҷудо  карданист. 
Роҳбари нави Намояндагии Иттиҳоди  Аврупо дар  ҶТ  — сафир Ҳидоят  Бишчевич  дар нишасти  матбуотӣ  ба  муносибати  аз  25  октябр то  2  ноябр  дар  Тоҷикистон  доир  шудани  Ҳафтаи  Аврупо  дар  ин бора  хабар  дод.
«Мо  дар  амри  ба  Тоҷикистон  расонидани  чунин  ёрӣ  мустақиман иштирок  менамоем.  Самтҳои  афзалиятноки  маблағгузориро  бахшҳои  тандурустӣ,  маориф,  кишоварзӣ  ташкил  медиҳанд. Мо  ҳамчунин  омодаем, ки  дар  риштаҳои энергетика,  нақлиёт ва бунёди  инфрасохтор ҳамкорӣ  намоем», —  гуфт Ҳидоят  Бишчевич. 
Сафири  нави  Иттиҳоди  Аврупо  дар  Тоҷикистон  ба  фаъолияти пештарааш  дахл  карда,  зикр  намуд, ки  дар  гузашта  ба  фаъолияти  журналистӣ  машғул  буда,   баъдтар  ба  ҳайси  сафири  Иттиҳоди  Аврупо  дар  Туркия  ва  Русия  кор  мекард.
«Мо  дар  ҷараёни  мулоқот ба  таҳкиму   густариши  минбаъдаи   муносибатҳои  дуҷонибаи Тоҷикистон  ва  Иттиҳоди  Аврупо  изҳори  умедворӣ  карда,  зикр  намудем, ки  Барномаи  дуҷонибаи  ҳамкорӣ  барои  солҳои  2014 – 2020  ҷиҳати татбиқи  минбаъдаи  лоиҳаҳо  дар  бахшҳои  маориф,  тандурустӣ  ва рушди  деҳот рӯи  кор  оварда  мешавад. Мо  ҳамчунин  перомуни  масоили   минтақавию  байналмилалӣ,  ҳамкорӣ  дар  соҳаи  энергетика, амният,  вазъияти  Афғонистон  ва  масоили  дигари  мубрам табодули  афкор  намудем»,  —  афзуд  Ҳидоят  Бишчевич.