Таъмини нафақахӯрон бо кортҳои пардохтии бонкӣ

Душанбе, 7.10.2014. (АМИТ “Ховар”, Мавҷуда Анварӣ).-«Аз охири моҳи сентябри соли ҷорӣ нафақагирони ноҳияи Рӯдакӣ пурра ба низоми “Пардохт тариқи кортҳои бонкӣ” гузашта, минбаъд нафақаи худро бо кортҳои пардохтии «Амонатбонк» бемамоният аз тамоми минтақаҳои ҷумҳурӣ дастрас менамоянд. 
Тибқи иттилои Бонки давлатии амонатгузории Ҷумҳурии Тоҷикистон «Амонатбонк» филилаи бонк дар ноҳияи мазкур минбаъд ба нафақагирони ноҳия, ки шумораашон 20 ҳазору 593 нафар аст, бо тарзи нав, яъне бо кортҳои пардохтӣ хизматрасонӣ менамояд. 
«Рӯзҳои наздик нафақагирони ноҳияҳои Айнӣ, Ашт, Спитамен, Фархор, Муъминобод, Ҷалолиддини Румӣ, Абдураҳмони Ҷомӣ, Файзобод, Шаҳринав, Варзоб ва Шуғнон пурра бо кортҳои пардохтии бонкӣ таъмин мешаванд, ки шумораи умумии нафақагирони ноҳияҳои мазкур беш аз 95 ҳазор нафарро ташкил медиҳад»-илова менамояд манбаъ. 
Айни ҳол «Амонатбонк» дар миқёси ҷумҳурӣ дорои 132 банкомат ва 428 адад ПОС-терминал аст.