Таваҷҷуҳи ширкати Русия ба бозори Тоҷикистон
Душанбе, 13.10.2014. (АМИТ «Ховар», Кристина Эрлих). — Чанде пеш дар шаҳри Душанбе мулоқоти соҳибкорони узви Палатаи савдо ва саноати Тоҷикистон бо намояндагони Гурӯҳи мошинсозии «КРАНЭКС» — и шаҳри Ивановои Федератсияи Русия баргузор гардид.
Тавре ки аз Палатаи савдо ва саноати Ҷумҳурии Тоҷикистон ба АМИТ «Ховар» хабар доданд, дар мулоқот мушовири Намояндагии тиҷоратии Федератсияи Русия дар Ҷумҳурии Тоҷикистон Муҳаммад Тоштемиров ширкат дошт.
«Мулоқот бо иштироки намояндагони бархе вазорату идораҳои кишвар, ҳамчунин роҳбарони корхонаҳои «Агротехсервис», «Агробизнеси Тоҷикистон», Ҷамъияти кушодаи саҳҳомии «Таҷам», Ҷамъиятҳои масъулияташон маҳдуди «Тиком», «Наврӯз ва М», ТАТСИАД аз таваҷҷуҳи ҷонибайн ба рушди ҳамкорӣ бо мушорикони Русия ва барқарор намудани равобити мутақобилаи муфид шаҳодат медиҳад», — зикр намуд сардори шуъбаи кор бо аъзои Палатаи савдо ва саноати ҶТ Сайёра Абдуллоева.
Дар ҷараёни мулоқот намояндагони корхонаҳои «Агротехсервис», «Агробизнеси Тоҷикистон» масоили роҳандозии ҳамкорӣ бо ширкати зикршудаи шаҳри Ивановоро баррасӣ намуданд.