Тири нашъаҷалоб хок хӯрд

 
Душанбе, 10.10.2014. (АМИТ «Ховар», Зарангези Латиф).- Аз тарафи кормандони шуъбаи ташкили мубориза бар зидди ҳуқуқвайронкунии гумрукии Раёсати минтақавии гумрукӣ дар шаҳри Душанбе дар натиҷаи гузаронидани амалиёти фаврӣ-ҷустуҷӯйӣ шаҳрванди Ҷумҳурии Тоҷикистон Сафархӯҷа Шарипови 33- сола бо ҷурми даст доштан дар нашъаҷалобӣ дастгир шуд. 
Бар пояи иттилои дафтари матбуоти Хадамоти гумрук, шаҳрванд Шарипов С. миқдори муайяни маводи мухаддири навъи «афюн»-ро аз шаҳрванди давлатии Исломии Афғонистон дар минтақаи наздисарҳадии ноҳияи Мир Саид Алии Ҳамадонӣ бо мақсади ба фурӯш баровардан харид намудааст. 
Мутобиқи ташхиси лабораторӣ маводи гирифташуда навъи афюн буда, вазни холиси он 9 кг 334 граммро ташкил медиҳад.
Оид ба ин ҳодиса парвандаи ҷиноӣ оғоз гардида, аз рӯи тобеияти тафтишотӣ ба Прокуратураи нақлиётии Ҷумҳурии Тоҷикистон ирсол карда шуд.