Ғолибони беҳтарин маводи журналистӣ дар соли 2014

Душанбе, 24.11.2014. (АМИТ “Ховар”, Зарангези Латиф).-Имрӯз дар Кохи Рӯдакии шаҳри Хуҷанд ғолибони озмуни вилоятӣ  барои беҳтарин маводи журналистӣ дар соли 2014 таҳти унвони «Инсон, замон ва ҷомеа» бо диплому мукофотпулиҳо сарфароз гардонида шуданд.
Раиси вилоят Абдураҳмон Қодирӣ дар ҳузури рӯзноманигорони расонаҳои хабарӣ изҳор дошт, ки дар ҷомеаи муосир нақши иттилоот ҳамчун як рукни маънавиёт басо муҳим буда, касби рӯзноманигорӣ аз касбҳои бонуфуз ва дар айни ҳол масъулиятталаб ба ҳисоб меравад.
Таъкид шуд, ки ҳадаф ва вазифаҳои озмун аз дастгирии журналистон ва кормандони расонаҳои иттилоотии вилоят, сари вақт иттилоотонии ҷомеа бо равандҳои рушду такомули соҳаҳои мухталифи хоҷагии халқ, шарҳу тавзеҳи воқеъбинона ва асосноки дигаргуниҳои ҳамарӯза ва проблемаҳои аҳамияти махсуси иҷтимоидошта, ҳамзамон ҷалби таваҷҷуҳи аҳли ҷомеа ба масъалаҳои доғи рӯз иборат буд ва ба он 45 нафар хабарнигори расонаҳои хабарии вилоят, инчунин журналистоне, ки вилоятро дар расонаҳои хабарии марказӣ намояндагӣ мекунанд, мавод пешниҳод намуд.
Ба иттилои дафтари матбуоти раиси вилояти Суғд Абдураҳмон Қодирӣ ёдовар шуд, ки дар озмуни мазкур масъалаҳои мухталифи иқтисодӣ, иҷтимоӣ, фарҳангӣ баррасӣ шуданд. Аз ҷумла, журналистон маводи худро бо мавзӯъ ва масъалаҳои марбут ба рушди кишоварзӣ, ташкил ва таҷдиди сохтори хоҷагиҳои калонҳаҷми кишоварзӣ, соҳиби ҳақиқии замин гардидани деҳқонон, масъалаҳои марбут ба саноат, нақлиёт ва роҳсозӣ, эҳё ва рушди саноати сабук, ҳунарҳои мардумии қолинбофӣ, сӯзанидӯзӣ ва адрасбофӣ, ба кор андохтани корхонаҳои саноатӣ, навоварӣ дар риштаи саноат ва иқтисод, «Соли 2014 — соли роҳҳои обод»  ва дигар масъалаҳои муҳими  ҷомеа пешниҳод намуданд, ки аз ҷониби ҳакамон мавриди баррасӣ қарор дода шуданд.