Ҳайати расмии Санкт — Петербург аз Ҳисор боздид менамояд

Душанбе,  7  ноябр. (АМИТ «Ховар», Екатерина  Пасторова ).-  6  ноябр  ташрифоти  ҳайати  расмии  Санкт — Петербург  бо  роҳбарии  губернатори он  Георгий  Полтавченко, ки  то  9  ноябр  идома  меёбад, оғоз  ёфт. 
Губернатори  Санкт — Петербург  дар  ҳошияи  сафараш  аз  Маҷмааи ваҳдату  эҳёи  миллии  Тоҷикистон  воқеъ дар  майдони  Дӯстӣ, Боғи  Ғалаба,  Кохи  Наврӯз, Наврӯзгоҳ,  Боғи  пойтахт,  мактаби  №92  — и  пойтахт,  корхонаи  алюминии  Тоҷикистон, корхонаи кабелсозии «Ноқили  Талко»,  Корхонаи  нассоҷии Тоҷикистон,  пойгоҳи  низомии  201 — уми  Русия  воқеъ  дар  шаҳри  Душанбе  ва Қалъаи  Ҳисор  дидан  мекунад.
Назар  ба  хабари  сафорати  Русия  дар  Тоҷикистон,  аз рӯи  натиҷаи  ин  сафар  ба  имзо  расонидани Ёддошт  дар  бораи  ҳамкорӣ  аз  рӯи  масоили  муҳоҷирати  меҳнатии  байни роҳбарии  Санкт — Петербург ва  раёсати   шаҳри  Душанбе,  ҳамчунин Созишнома  дар  бораи  ҳамкории  макотиб  дар  назар  аст.