Ҷаласа таҳти раёсати М.Ҷабборӣ

Душанбе, 18.11.2014. (АМИТ «Ховар»).-Имрўз таҳти раёсати муовини Сарвазири Ҷумҳурии Тоҷикистон, раиси Шўро Марҳабо Ҷабборӣ нахустин ҷаласаи Шўрои миллии рушди маорифи назди Ҳукумати Ҷумҳурии Тоҷикистон баргузор гардид.Дар кори ҷаласаи Шўро баррасии масъалаҳои мубрами соҳа, аз ҷумла оид ба вазъи воқеии сифати таълим ва роҳҳои беҳтар намудани он дар муассисаҳои таълимӣ, натиҷаи имтиҳонҳои марказонидаи дохилшавӣ ба муассисаҳои таҳсилоти олии касбӣ тавассути Маркази миллии тестии назди Президенти Ҷумҳурии Тоҷикистон, оид ба натиҷаи хатми донишҷўёни тибқи квотаи Президентӣ таҳсилнамуда, ба ҷои кор ҳозир шудани онҳо ва донишҷўёне, ки тариқи буҷавӣ муассисаҳои таълимиро хатм намудаанд, доир ба фаъолияти Комиссияи ҷумҳуриявӣ оид ба интихоб ва тайёр намудани кадрҳо дар муассисаҳои таҳсилоти олӣ ва илмии давлатҳои хориҷӣ, тасдиқи нақшаи кори Шўрои миллии рушди маорифи назди Ҳукумати Ҷумҳурии Тоҷикистон дар соли 2015 барраси шуданд.Вобаста ба масъалаҳои баррасишаванда ҳисоботи вазири маориф ва илм, директори Маркази миллии тестии назди Президенти Ҷумҳурии Тоҷикистон, директори Маркази барномаҳои байналмилалӣ шунида шуд. Дар ҷаласа намояндагони вазорату идораҳо, мақомоти иҷроияи маҳаллии ҳокимияти давлатӣ, иттиҳодияҳои ҷамъиятӣ ва дигар шахсони маъсул иштирок доштанд.