Ҷашнвораи сеюми байналмилалии адабӣ

Душанбе,  4 ноябр. (АМИТ «Ховар»,  Кристина  Эрлих).-  Хонаи  интишороти «Hertfordshire Press» — и  Британия  бо  дастгирии Палатаи  миллию  давлатии китоби  Ҷумҳурии  Қазоқистон  зимни  ҳамкорӣ  бо  Маркази  «Таълим ва  консалтинг» — и  Елена  Безрукова  аз  14  то  17  ноябр  дар  шаҳри  Алмаато  Ҷашнвораи  сеюми байналмилалии  адабиро  доир  менамояд.
Тавре  ки  ташкилкунандагони   чорабинӣ ба  АМИТ «Ховар»  хабар  доданд,  мақсад  аз  ин   воқеаи  нодир тарғиби  адабиёт  дар  қаламрави  Осиёи  Марказӣ  мебошад,  ки он  бояд   нависандагони  на  фақат  минтақаи  Осиёи  Марказӣ,  балки  ҳамаи  кишварҳои  ҷаҳонро  муттаҳид  сохта,   насру  назми  миллиро  аз  нигоҳи  иттилоот дастгирӣ  намояд. 
Ситораҳои  адабиёти  ҷаҳон  аз  қабили  Януш  Леон  Вишневский  (Лаҳистон), Дэвид Пари, Ник Рован, Шоҳсанам  Мюррей,  Лаура  Ҳамелтон (Британияи  Кабир)  Пол  Вилсон (Австралия), Қаззот Оқматов (Қирғизистон),  Галина  Долгая ва  Зуҳур  Ҳасанов  меҳмонони  фахрии  ҷашнвора  мебошанд. 
Дар  ҷашнвора   нависандагони  Австрия,  Австралия,  Озарбойҷон,  Фаронса, Ирландия,  Қазоқистон, Англия,  Қирғизистон, Лаҳистон, Эстония, Нидерланд,  ИМА, Ӯзбекистон,  Литва¸ Тоҷикистон,  Африқои  Ҷанубӣ, Русия, Туркия,  Туркманистон ва  кишварҳои  дигар  иштирок  менамоянд.