Ҷомеаи шаҳрвандӣ гуногунандешии сиёсиро кафолат медиҳад

Душанбе, 5.11.2014. (АМИТ «Ховар», Зарангези Латиф).- Имрӯз Президенти мамлакат Эмомалӣ Раҳмон зимни суханронии хеш дар  маҷлиси тантанавӣ бахшида ба таҷлили 20-умин солгарди Конститутсия иброз намуд: «Конститутсия дар асоси равияҳои гуногуни сиёсӣ ва мафкуравӣ рушд ёфтани ҳаёти ҷамъиятиро эълон намуда, мафкураи ҳеҷ як ҳизб, иттиҳодияи ҷамъиятӣ, динӣ, ҳаракат ва гурӯҳеро ба ҳайси мафкураи давлатӣ эътироф накардааст».
Ҳамчунин зикр гардид, ки: «Ҷомеаи шаҳрвандӣ рақобати озоди ҳизбу ҳаракатҳоро бо усули гуногунандешии сиёсӣ ва мафкуравӣ эътироф намуда, кафолат медиҳад».
«Ин ҳаргиз маънои онро надорад, ки ҳизбу ҳаракат ва созмону иттиҳодияҳои диниву ҷамъиятӣ ба ҳаёти мардум мафкураҳоеро таҳмил намоянд, ки онҳо суннату арзишҳои муқаддаси миллӣ, ваҳдат, субот ва амнияти ҷомеа, якпорчагӣ ва низоми қонунияти давлатиро халалдор созанд»,- гуфт Сарвари Давлат Эмомалӣ Раҳмон.
Президенти кишвар Эмомалӣ Раҳмон таъкид намуд: Конститутсия таъсис ва фаъолияти иттиҳодияҳои ҷамъиятӣ ва ҳизбҳои сиёсиеро, ки нажодпарастӣ, миллатгароӣ, хусумат, бадбинии иҷтимоӣ ва мазҳабиро тарғиб мекунанд ё барои ба зӯрӣ сарнагун кардани сохтори конститутсионӣ даъват менамоянд, манъ намудааст.