Алоқа-омили пешбурди мудофиа

Душанбе, 19.11.2014. (АМИТ “Ховар”, Лайло Тоирӣ). — Аз рӯзҳои нахустини таъсиси Артиши миллӣ дар тобеияти Ситоди генералии Қувваҳои Мусаллаҳ ва ҷузъу томҳои Вазорати мудофиа Раёсати алоқа ва воҳидҳои вобастаи ин соҳа амал менамоянд, ки ҳайати шахсии он дар самти иҷрои вазифаҳои ҷангӣ ва таъмин намудани қисму воҳидҳои низомии Артиши миллӣ бо воситаҳои алоқаи ҳозиразамон саҳми арзанда дорад.Бино ба иттилои хадамоти матбуоти Вазорати мудофиаи ҷумҳурӣ, барои сайқал додани маҳорати касбӣ ва баланд бардоштани донишу малакаи ҳайати шахсии алоқачиёни ҷузъу томҳои Артиши миллӣ, дар самти истифода намудани технологияҳои пешқадами соҳаи алоқа пайваста машғулиятҳои таълимӣ доир мешаванд ва зимни он аз таърихи пайдоиши воситаҳои алоқа, марҳилаҳои пешрафти ин соҳа ва омӯхтану аз бар намудани низоми муосири алоқа роҳандозӣ мегардад.Чунин машғулиятҳои омӯзишӣ асосан тибқи нақша дар давраҳои зимистону тобистонаи омӯзишӣ соле чандин маротиба доир гашта, масъулини соҳа ё худ онҳое, ки ба чунин машғулиятҳо ҷалб гардидаанд, вобаста ба дониш ва малакаи аз бар намуда, дар назди афсарони баландихтисоси Раёсати алоқа ва технологияи итилоотии Ситоди генералии Қувваҳои Мусаллаҳ санҷиш месупоранд.Қобили зикр аст, ки чунин ҷамъомад ва ё худ машғулиятҳои методӣ-таълимӣ на танҳо бо ҷалби алоқачиёни ҷузъу томҳои Вазорати мудофиа, балки дар ҳамоҳангӣ бо иштироки масъулини вобастаи алоқаи дигар сохторҳои низомии мамлакат низ доир мегарданд ва зимни баргузории чунин машғулиятҳои омӯзишӣ ҳар дафъа талаботи нав ва навовариҳои зиёде барои пешбурди соҳаи алоқа дар Қувваҳои Мусаллаҳ ворид мешаванд.