Авфшуда ба маҳбас бармегардад

Душанбе, 11.11.2014. (АМИТ «Ховар», Муқаддас Темурзода).-Тавре ки ВКД ҶТ иттилоъ медиҳад, дирӯз зимни гузаронидани чорабиниҳои фаврӣ-ҷустуҷӯӣ муайян шуд, ки шаҳрванд Табур Ғафуров, соли таваллудаш 1983, сокини ноҳияи Айнӣ, пеш бо моддаҳои 111 қисми 3, КҶ ФР ва 244 қисми 2 КҶ ҶТ суд шудааст ва мувофиқи Қонуни ҶТ “Дар бораи авф” аз 29.10.с.2014 ба озодӣ баромада, 08.11.с.2014 дар ҳавлии истиқоматиашон аз сабаби муноқишаи ба миён омада бо падараш Исомиддин Ғафуров, соли таваллудаш 1959 ҷанҷол намуда, бо чӯбдасти дар дасташ буда 1 маротиба ба сари ӯ задааст. Дар натиҷа ҷабрдида аз ҷароҳати вазнини ҷисмонӣ дар ҷойи ҳодиса ба ҳалокат расидааст.Сарчашма ҳамчунин хабар медиҳад, ки имрӯз дар дохили яке аз қаҳвахонаҳои воқеъ дар маҳаллаи Гипроземи пойтахт шахси номаълум шаҳрванд Зайнидин Назаров, соли таваллудаш 1961, сокини ш. Душанберо бо истифодаи корд ба рӯяш зада, ҷароҳати вазнини ҷисмонӣ расонидааст. Дар натиҷаи бурдани корҳои фаврӣ-ҷустуҷӯӣ кормандони милитсия шаҳрванд Абдуҳаким Юсуфов, соли таваллудаш 1977, истиқоматкунандаи ноҳияи Рӯдакиро, ки пеш бо моддаи 228 КҶ ФР суд шудааст, дастгир намуданд. Нисбат ба далелҳои мазкур парвандаи ҷиноятӣ оғоз гардида, тафтиш идома дорад.