Баргузории Конфронси олимони ҷавони Тоҷикистон

Душанбе, 08.11.2014 (АМИТ “Ховар”, Фарзонаи Давлат).-«Бузургдошти мутафаккирони илму адаби тоҷик Абдураҳмони Ҷомӣ, Мир Сайид Алии Ҳамадонӣ ва 3000-солагии Ҳисори бостонӣ»-таҳти чунин унвон имрӯз дар Китобхонаи миллии Тоҷикистон конфронси илмӣ — амалӣ баргузор гардид.Ба иттилои мудири бахши таҳлилу иттилооти Кумитаи ҷавонон, варзиш ва сайёҳӣ Ҷалолиддин Нуров, конфронси мазкур бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон доир гардида, дар кори он намояндагони дастгоҳи иҷроияи Президенти Ҷумҳурии Тоҷикистон ва Академияи илмҳои Ҷумҳурии Тоҷикистон, олимону муҳаққиқони ҷавон ва донишҷўёни муассисаҳои таҳсилоти олии касбии мамлакат иштирок доштанд.Гуфта мешавад, ки дар конфронси мазкур нақшу мақоми Абдураҳмони Ҷомӣ дар адабиёти классикии тоҷику форс, ҳаёт ва эҷодиёти Мир Сайид Алии Ҳамадонӣ ва таъриху фарҳанги пурғановати Ҳисори Шодмон мавриди таҳқиқу баррасӣ қарор гирифт. Дар конфронс раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода оид ба пешрафти илму техника ва дастовардҳои олимони ҷавон дар ин соҳа ибрози назар намуд. Мақсад аз баргузории конфронс сарҷамъ намудани олимони ҷавон, рушди илму фарҳанг ва ба ин васила онҳоро барои дастовардҳои илми роҳнамун сохтан мебошад.