Барномаи рушди соҳаи чорводорӣ дар Ҳамадонӣ

Ҳамадонӣ, 22.11.2014 (АМИТ «Ховар», Сулаймони Хол).-Баъди тачдиди сохтори хоҷагии қишлок ва аз ҳисоби хоҷагиҳои ҷамоавӣ ташкил намудани кооперативҳои истеҳсолию хоҷагиҳои хурди деҳқонӣ шумораи хоҷагиҳо даҳҳо баробар афзуд. Хоҷагиҳои мазкур дар самтҳои гуногун фаъолият намуда ба пахтакорию, сабзавоткорӣ, боғдорию чорвопарварӣ машғул гардиданд. Дар ин кор чорвопарварони ноҳияи Ҳамадонӣ муваффақ гардидаанд. Айни замон дар ноҳияи ба номи Мир Саид Алии Ҳамадонӣ 78 кооперативҳои истеҳсолӣ ва хоҷагиҳои инфиродию хоҷагиҳои хурди деҳқонӣ ба парвариши ҳайвони калони шохдор, моли майда ва асппарварӣ машғуланд. Бино ба иттилои раёсати кишоварзии ноҳия саршумори чорво давоми чор соли охир рӯ ба афзоиш дорад. Тавре Низомиддин Ғиёсов, сарбайтори ноҳия иттилоъ дод, қисми зиёди хоҷагиҳои деҳқонӣ ҳангоми таҷдиди хоҷагиҳои ҷамоавӣ саҳми хешро пурра гирифта натавонистанд ва новобаста ба ин дар натиҷаи меҳнати софдилона тавонистанд хоҷагиҳои хешро аз ҷихати иқтисодӣ мустаҳкам намоянд.