Баррасии эҳё ва рушди кинои тоҷик дар ҳузури Марҳабо Ҷабборӣ
Муовини Сарвазири Ҷумҳурии Тоҷикистон Марҳабо Ҷабборӣ директори генералии Фонди давлатии кинофилмҳои Федератсияи Россия (Госфильмофонд) Бородачев Николай Михайловичро ба ҳузур пазируфт. Зимни мулоқот вобаста ба таърих ва марҳилаҳои рушди кинои тоҷик андешаҳо баён гардида, таъкид шуд, ки воқеан филмҳои офаридаи тоҷикон тавонистааст дар арсаи байналмилалӣ Тоҷикистон ва таърихи пурғановати миллати тоҷикро муаррифӣ намояд. Дар ин ҷода аз саҳми назарраси Тоҳир Собиров, Борис Кимёгаров, Комил Ёрматов ва дигарон дар рушди офаридани филмҳои тоҷикӣ хотиррасон шуданд.Николай Бородачев, ки аз дастпарварони соҳаи кинои тоҷик ба шумор рафта, имрӯз дар ин вазифа фаъолият дорад, аз пешрафту ободии Тоҷикистон хуш истиқбол намуд ва омодагии худро барои ҳамкорӣ дар соҳаи филмофарӣ, эҳё ва рушди ин соҳаи дар Тоҷикистон баён намуд. Қайд кард, ки тамоми нусхаи асли филмҳои офаридашудаи замони Тоҷикистон Шӯравӣ дар Фонди давлатии кинофилмҳои Федератсияи Россия маҳфуз нигоҳ дошта мешавад, ки ибтидои он аз филми ҳанӯз соли 1929 аз ҷониби «Тоҷикфилм» ба навор гирифташуда сарчашма мегирад ва Фонд тайёр аст барои барқароркуниву дастрасӣ ба нусхаҳои он ба Кумитаи телевизион ва радио ва Вазорати фарҳанги Ҷумҳурии Тоҷикистон мусоидат намояд.Марҳабо Ҷабборӣ дар навбати худ аз иқдоми роҳбарияти фонди мазкур миннатдорӣ баён карда, дар баргузор намудани чорабиниҳои сатҳи байналмилалӣ, намоиши филмҳо, ташкили кинофестивалҳо, ки аз ҷониби Фонди давлатии кинофилмҳои Федератсияи Россия дар ҳамкорӣ бо вазорату идораҳои дахлдори кишвар дар Ҷумҳурии Тоҷикистон роҳандозӣ мегарданд, ҷонибдории хешро зикр намуд. Аз ҷумла таъкид дошт, ки намоиши филмҳо метавонад насли наврасро дар руҳияи ватандӯстиву хештаншиносӣ, дӯстиву рафоқат, меҳнатдӯстиву адолатхоҳӣ ва дигар хислатҳои хуби инсонӣ ба воя расонад. Дар мулоқот роҳбарияти Вазорати фарҳанг ва Кумитаи телевизион ва радиои назди Ҳукумати Ҷумҳурии Тоҷикистон ширкат варзиданд.