Боздошти қӯруқшиканон бо 500 кг моҳӣ

Қайроққум, 14.11.2014. (АМИТ “Ховар”, Абдуаҳад Шарифзода).- Тавре ки ба АМИТ “Ховар” роҳбари маркази матбуоти РВКД ҶТ дар вилояти Суғд Акбар Шарифов иттилоъ дод,  дирӯз зимни гузаронидани  чорабинии ҳуқуқӣ аз тарафи кормандони шуъбаи милисияи экологии вилоят як ҳолати ҳуқуқвайронкунӣ, яъне риоя накардани қоидаҳои шикори ҳайвонот ва моҳигирӣ ошкор шуд. Ба гуфти манбаъ зимни чорабинӣ  ду  сокини ҷамоати деҳоти Лоҳутии ноҳияи Конибодом Мирасрор Абдуллоев ва Замир Раҳимов дар  мавзеи обанбори  шаҳри Қайроққум  худсарона бе иҷозатномаи мақомоти дахлдор ҳангоми сайди моҳӣ бо мақсади манфиати молӣ боздошт шуданд. 
Ҳангоми боздошт аз қӯруқшиканон ба миқдори умумии 475 кг намудҳои гуногуни моҳӣ мусодира шуданд, ки  зарари умумии  он 6 000 сомониро  ташкил дод. Аз рӯи далели мазкур  нисбат ба қонуншиканон протоколи маъмурӣ тартиб дода шуда, барои баррасӣ ба суд ирсол гардид.