Боздошти қочоқбарони фаромиллӣ

Хоруғ, 21.11.2014. (АМИТ «Ховар», Файз Мирасан).-Аз маркази матбуоти Раёсати Кумитаи давлатии амнияти миллии Ҷумҳурии Тоҷикистон дар Вилояти Мухтори Кӯҳистони Бадахшон иттилоъ доданд, ки кормандони ин раёсат дар ҳамкорӣ бо марзбонон ва дастгирии аҳолӣ боз як масири қочоқи маводи мухаддир аз самти Ҷумҳурии Исломии Афғонистонро бастанд. 
Ин гурӯҳи қочоқбарони фаромиллии маводи мухаддир дар ҳайати сокинони деҳаи Баҷуви ноҳияи Рӯшон ва Бунии ноҳияи Шуғнон Сабзалиев Ношинос Қурбоналиевич, соли таваллудаш 1977, инчунин Қубодбеков Қубодбек Шомуродхонович, соли таваллудаш 1958 ва Саидназаров Фез Олимназарович, соли таваллудаш 1979 тибқи маслиҳати қаблӣ  бо нашъаҷаллобони афғон мехостанд миқдори муайяни маводи  нашъаоварро ба қаламрави Ҷумҳурии Тоҷикистон  интиқол диҳанд.
Ба ин мақсад онҳо рӯзи 16-уми октябри соли 2014  аз деҳаи Бунии ноҳияи Шуғнон тавассути телефони мобилӣ бо Насрулло ном шаҳрванди Ҷумҳурии Исломии Афғонистон, истиқоматкунандаи деҳаи Шидвуҷи вулусволии Шуғнони вилояти Бадахшон оид ба  интиқоли маводи мухаддир ба воситаи хатти сарҳади давлатии Ҷумҳурии Тоҷикистон ба мувофиқа расиданд. 
Худи ҳамон рӯз, ҳангоми доду гирифти маводи мухаддир  шаҳрвандони Ҷумҳурии Тоҷикистон аз ҷониби кормандони мақомоти амнияти вилоят боздошт шуданд, аммо  дар рафти задухурди мусаллаҳона қочоқчиёни афғон аз ҷои ҳодиса ба самти кишвари ҳамсоя фирор намуданд.
Дар натиҷаи амалиёти ҷустуҷӯӣ аз ҷои ҳодиса 1 килограмму 285 грамм маводи мухаддири навъи «ҳашиш» дарёфт ва мусодира карда шуд. 
Аз рӯйи ҳодисаи  мазкур парвандаи ҷиноӣ оғоз шуда, тафтишот идома  дорад.