Бузургдошти Мир Саид Алии Ҳамадонӣ

Душанбе, 11.11.2014. (АМИТ «Ховар», Раъно Нусратуллозода).-Бо ташаббуси раёсати илм, кафедраи фанҳои гуманитарӣ ва кафедраи забонҳои тоҷикӣ ва русии Донишкадаи молия ва иқтисоди Тоҷикистон бахшида ба 700-солагии Мир Саид Алии Ҳамадонӣ 7 ноябри соли ҷорӣ дар донишкада дар мавзӯи «Шоири ориф ва мутафаккири шаҳир» мизи мудаввар доир гардид. Тавре ки аз донишкадаи мазкур Машҳура Абдуллоева иттилоъ дод, дар ҷамъомад муовини ректор оид ба илм, дотсент Ғиёсиддин Ашӯров дар бораи ҳаёт ва фаъолияти ин мутафаккири бузурги форсу тоҷик маълумот дода, иброз дошт, ки ақоиди иҷтимоию сиёсии Мир Сайид Алии Ҳамадонӣ хусусияти пешқадамона дошта, бартариятҳои асосҳои ақидаҳои баланди инсондӯстонаро дар бар мегиранд.Баъдан дар мавзӯи «Муҳаммади Нурбахш ва наҳзатҳои истиқлолхоҳӣ дар Хатлон», «Сифатҳои ҷавонмардӣ аз нигоҳи Мир Саид Алии Ҳамадонӣ», «Таъсири Мир Саид Алии Ҳамадонӣ дар густариши ислом ва адабиёти форсӣ дар Кашмир» маърӯзаҳо шунида шуданд.