Чорабинии фарҳангӣ бахшида ба ҷашни Парчам

 Душанбе, 24.11.2014. (АМИТ “Ховар”, Сабоҳат Қадамзода). — Дар бинои асосии Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд бахшида ба ҷашни Парчами миллӣ чорабинии фарҳангӣ баргузор гардид. Дар чорабинӣ намояндагон аз Мақомоти иҷроияи ҳокимияти давлатии вилояти Суғд ва шаҳри Хуҷанд, устодону донишҷӯёни донишгоҳ ширкат доштанд.
Ректори донишгоҳ Ҷамшед Ҷӯрабоев гуфт, ки парчаму парчамбардорӣ аз гузаштагонамон ба мо мерос мондааст. Ҳадафи баргузории чорабинӣ- ин пеш аз ҳама шиносоии ҷавонон бо анъана ва дастовардҳои миллӣ, бедор кардани ҳисси ватандӯстӣ ва ҳуввияти миллии ҳар як фард мебошад.
Сипас аз тарафи раёсати донишгоҳ донишҷӯёни болаёқат, ки дар ҷодаи илм ва таълиму тарбия фаъолияти пурсамар нишон додаанд, бо диплом, ифтихорнома ва сипосномаҳо сарфароз гардонида шуданд.                           
Дар ин бора аз дафтари матбуоти вилояти Суғд иттилоъ доданд.