Дар 172,5 ҳазор гектар ғалладона кишт мешавад
Душанбе, 5.11.2014. (АМИТ «Ховар», Зарангези Латиф).- Соли ҷорӣ дар майдони 605,6 ҳазор гектар шудгор ва дар майдони 185.1 ҳазор гектар кишти зироатҳои кишоварзӣ гузаронида мешавад. Дар айни замон дар ҷумҳурӣ дар майдони 86,1 ҳазор гектар шудгор ва дар 58,5 ҳазор гектар кишти тирамоҳии зироатҳои кишоварзӣ гузаронида шудааст, ки нисбат ба ҳамин давраи соли гузашта майдони шудгор ва кишти тирамоҳии зироатҳои кишоварзӣ зиёд аст.Имсол тибқи дурнамо дар ҷумҳурӣ дар майдони 172,5 ҳазор гектар кишти ғалладонагиҳо гузаронида мешавад, ки ҳоло дар майдони 52,3 ҳазор гектар кишт гузаронида шуда, он баробари 30 фоизи дурнамо мебошад. Нисбат ба ҳамин давраи соли гузашта кишти ғалладонагӣ дар майдони 6245 гектар зиёд мебошад. Аз ҳисоби кишти умумии зироатҳои ғалладонагиҳо майдони 46,8 ҳазор гектарро гандум ва 5445 гектарро ҷав ташкил медиҳад.Ба иттилои Вазорати кишоварзии мамлакат дурнамои кишти тирамоҳии пиёз соли ҷорӣ 10527 гектарро ташкил медиҳад, Ҳоло дар майдони 6171 гектар кишти тирамоҳии пиёз гузаронида шудааст, ки баробари 58,6 фоизи дурнамо мебошад. Дар ҷумҳурӣ нисбат ба ҳамин давраи соли гузашта 1426 гектар зиёд кишти тирамоҳии пиёз гузаронида шудааст.