Дар ВМКБ шумораи талоқ 4,5 фоиз кам шудааст

Душанбе, 26.11.2014. (АМИТ «Ховар», Лайло Тоирӣ). — Шумораи никоҳи бақайдгирифтаи мақомоти сабти асноди ҳолати шаҳрвандӣ дар ҷумҳурӣ дар моҳҳои январ -сентябри соли 2014 нисбат ба ҳамин давраи соли 2013 — 2,9 фоиз зиёд шуда, 66,5 ҳазор ҷуфти никоҳро ташкил кардааст. Коэффитсиенти умумии никоҳ дар моҳҳои январ- сентябри соли 2014 ба 1000 нафар аҳолӣ 10,8 ададро ташкил додаст.Бино ба иттилои Агентии омори назди Президенти Ҷумҳурии Тоҷикистон, афзоиши бақайдгирии никоҳ дар моҳҳои январ сентябри соли 2014 нисбат ба ҳамин давраи соли 2013 дар ҳамаи минтақаҳои ҷумҳурӣ мушоҳида гашта, дар ВМКБ бақайдгирии никоҳ дар ин давра 2,2 фоиз, дар вилояти Суғд-4,2 фоиз, дар вилояти Хатлон 1,1 фоиз, дар Душанбе -8,2 фоиз дар ноҳияҳои тобеи ҷумҳурӣ 2,8 фоиз зиёд шудааст. Шумораи талоқҳои бақайдгирифташуда дар моҳҳои январ — сентябри соли 2014 -6845 воҳидро ташкил карда, нисбат ба ҳамин давраи соли 2013 — 18,7 фоиз (1077 талоқ) афзудааст. Афзоиши шумораи бақайдгирифташудаи талоқ дар ҳамаи минтақаҳо ба назар мерасад, ба ғайр аз ВМКБ дар вилояти Суғд 18,7 фоиз, дар вилояти Хатлон 12,2 фоиз, дар Душанбе 13,9 фоиз ва дар НТҶ 30,9 фоиз талоқ ба қайд гирифта шудааст. Дар ВМКБ шумораи талоқҳои бақайдгирифта 4,5 фоиз кам шуда, 64 воҳид талоқро ташкил дод. Шумораи талоқ ба 1000 никоҳи басташуда дар моҳҳои январ-сентябри соли 2014 -103 талоқ рост омадааст. Ин нишондиҳанда дар ҳамин давраи соли гузашта ба 89 талоқ рост омада буд.