Дастгир гардидани нашъаҷаллоби афғон
Душанбе, 17.11.2014. (АМИТ «Ховар», Муқаддас Темурзода).- Тавре ки ВКД ҶТ иттилоъ медиҳад, дирӯз кормандони шуъбаи ВКД дар ноҳияи Шӯрообод зимни гузаронидани чорабиниҳои фаврӣ-ҷустуҷӯӣ дар ҳудуди деҳаи Кишти ноҳия шаҳрванди Ҷумҳурии Исломии Афғонистон Ҳабиб валади Абдураҳмон, соли таваллудаш 1992-ро бо гумони даст доштан дар гардиши ғайриқонунии маводи мухаддир дастгир намуданд. Дар вақти кофтукови шахсӣ аз борхалтаи ў 16 кг 850 грамм маводи нашъадори бангдона дарёфт ва мусодира гардид.
Манбаъ ҳамчунин хабар медиҳад, ки дар ин рӯз зимни як амалиёти махсуси дигар дар ҳудуди кӯчаи Айнии шаҳри Душанбе аз ҷониби кормандони милитсия сокини ноҳияи Рӯдакӣ Сайдалиев Аъзам Маҳмадович, соли таваллудаш 1986 дастгир шуд. Дар вақти кофтукови шахсӣ аз кисаи шими варзишии дастгиршуда ва дар вақти азназаргузаронии хонаи истиқоматиаш 65 адад ҳаб дарёфт гардид, ки ба маводи нашъадори экстезӣ мансуб буда, вазни умумиаш 19,8 граммро ташкил дод.
Нисбат ба далелҳои мазкур парвандаи ҷиноятӣ оғоз гардида, тафтиш идома дорад.