Дуввумин мусобиқаи Ҷоми “Вастан” дар Душанбе

Душанбе, 18.11.2014. (АМИТ “Ховар”, Зарангези Латиф).-Дувумин мусобиқаи кушода оид ба дзюдо байни наврасон барои Ҷоми «Вастан” рӯзҳои 22-23-юми ноябр дар шаҳри Душанбе баргузор мешавад.
Мусобиқаи мазкур дар Маҷмааи варзишии Кумитаи андози назди Ҳукумати Ҷумҳурии Тоҷикистон байни наврасони солҳои таваллудашон 1997-1999 барои Ҷоми Бошгоҳи варзишии «Вастан” барпо мегардад. Ташкилкунандагони ин мусобиқа  Кумитаи ҷавонон, варзиш ва сайёҳии Тоҷикистон, Федератсияи дзюдои кишвар ва Бошгоҳи варзишии «Вастан”мебошанд.
Дар мусобиқа ба ҷуз паҳлавонони ҷавони тоҷик, варзишгарони Афғонистон, Беларус, Қазоқистон, Қирғизистон, Русия, Туркия, Ӯзбекистон ва Эрон ширкат хоҳанд кард. Ба мусобиқа инчунин доварони дараҷаи байналмилалӣ аз Русия, Қазоқистон, Қирғизистон, Ӯзбекистон ва Эрон даъват шудаанд.